Ingólfur Rögnvaldsson barnahjartalæknir hlaut Míuverðlaunin sem voru afhent í fimmta sinn við hátíðlega athöfn á Mengi, í miðbæ Reykjavíkur, á fimmtudag. Tíu heilbrigðisstarfsmenn sem vinna með langveikum börnum voru heiðraðir á viðburðinum.
„Míuverðlaunin eru verðlaun til að heiðra þá sem koma að þjónustu langveikra barna á einn eða annan hátt. Einhver sem hefur hjálpað eða stutt við þig og þína fjölskyldu á erfiðum tíma. Það sem þeim finnst vera „bara vinnan sín“ getur skipt sköpum fyrir aðstandendur langveikra barna og börnin sjálf. Hægt er að tilnefna heilbrigðisstarfsmann í hvaða starfsstétt sem er, hvar á landinu sem er,“ er haft eftir Þórunni G. Evu Pálsdóttur, stofnanda Miu Magic, í tilkynningu um verðlaunin.
Segir þar enn fremur að tuttugu heilbrigðisstarfsmenn hafi verið tilnefndir í ár og valnefnd Míuverðlaunanna valdi svo topp tíu hópinn sem mættur var á Mengi á fimmtudagskvöld.
Egill hjá mbl.is ritaði fallega frétt um Míuverðlaunin og ætla ég að leyfa henni að fylgja hér með: LESA
Verðlaunagripurinn. Kertastjakinn er hannaður af íslenska listamanninum Óla Hilm og prýðir orðið „hugrekki“ sem hefur verið einkennisorð Míu Magic og er tekið úr fyrstu bókinni, Mía fær lyfjabrunn. Hér er Óli ásamt dóttir sinni, Þórunni og Ingólfi, barnahjartalækni.
Þakkir til þeirra fyrirtækja og einstaklinga sem tóku þátt eru ó svo innilegar því þetta væri ekki hægt án ykkar. Töst, Ölgerðin, Verma, Danól, Artasan, Sælkerabúðin, Gulli Arnar, Luna Studio, Eventum, Anna Steinsen, Sigga Ózk, Óli Hilm, Reykjavík Letterpress, Trúðavaktin, Rakel Ósk ljósmyndari, Pixel, Prentun.is, Signa, Epal og fleiri.
Takk Eventum fyrir að setja upp viðburðinn í ár.
